الطقاقه نورا في حفل للجن

الطقاقه نورا في حفل للجن

ايه ممكن يخلي فنانة شعبية تقرر فجاه انها تعتزل في عز نجوميتها هي وفرقتها بالكامل الى بتتكون من ٧ فتيات قرروا جميعا اعتزالهم تماما

في بداية التسعينات ظهرت مطربة شعبية خليجية من دولة الكويت اسمها نورا

واشتهرت باسم (الطقاقة نورا)

نورا كانت بتتميز بصوتها الجميل والقوي والجو المبهج اللي كانت بتعمله في حفلاتها..

ده غير أنها كانت بتألف أغانيها بنفسها ..

وأوقات كتير كمان بتلحنها...

ونظرا أن الوقت ده مكنش في دي جي ولا كاست

كانت الافراح كلها بتعتمد على الفرق الموسيقية واللي غالبا كانت بتبقي فرق غنائيه زى فرقة نورا الطقاقة

نورا وفرقتها أقاموا افراح لامراء وملوك وكمان لناس عادية وكان ليهم شهره كبيره فى كل الوطن العربى

فجاه اختفت نورا الطقاقه هى وفرقتها بدون اى مقدمات وماحدش يعرف ايه الى حصلهم ولا راحوا فين

لكن فى النهايه تركوا قصه من اغرب القصص الى بتتردد فى الكويت والوطن العربى ...

في يوم

نورا جالها اتصال من سيده وقالت لها

احنا عايزينك مع فرقتك في فرح بنتي ...

ونفسنا تيجي.. وكلنا هنا بنحبك وانتي اللي هتفرحينا ... وياريت تشرفينا

نورا فى الوقت ده كانت اشتهرت جدا وكانت بتشتغل بجدول أعمال.

نورا قالتها

خلاص ابشري جيالك انا والفرقة

فرحكم امتي؟

السيده قالتها النهاردة ١٠ بالليل

نورا بسرعة كلمت فرقتها وقالتهم

عندنا طلعة الليلة ولازم نروحها

وبالفعل اتجمعوا قبل المعاد

واتحركوا رايحين علي العنوان اللي اخدوه من الست

واول موصلوا لحي الصباحية بالكويت لقوا بيت كبيييير جدااا بجنينه كبيره مليان انوار وزينة

وضيوف مالهمش عدد و اطفال في كل مكان... فرح فعلا متكلف جامد وبوفيه كبير جدا

البيت كان زحمة جدا لدرجة أنهم مكنوش عارفين يتحركوا في وسط الناس عشان يدخلوا جوا البيت

وبعد موصلوا جوه بصعوووبة... دخلوهم في أوضة مخصصة لاستقبالهم ..علشان يغيروا فيها الملابس

وجالهم بنات من الضيوف يسلموا عليهم ...

وفي الوقت اللي كانوا بيستعدوا فيه للخروج

واحدة من بنات الفرقة قالتها

انتي مش ملاحظة حاجة ؟!

نورا في الوقت ده كان قلبها فعلا مقبوض وملاحظة بس كانت مكدبة نفسها ومش عايزة حد يأكدلها الاحساس ده وعلشان كمان الفرقه ماتقلقش لمجرد احساس

فقالت للبنت بكل حزم لا مش ملاحظة ويلا نطلع

قالتها استني بس ..

ليه البنات اللي سلموا علينا ملمس وشوشهم كلهم خشن ؟ ليه كلهم تُقال جدااا مجرد مبيقربوا مني بحس اني مخنوقة!؟ ...

نورا فتحت الباب وقالت لها مفيش حاجة من اللي انتي بتقولي عليه ويلا بينا نطلع .....

طلعت نورا وفرقتها وبدأوا يفرشوا عدتهم... وبدأت السهرة والأغاني ..واول مالساعة عدت ١٢ بدأ الحماس يزيد بشكل كبير وبدأوا المعازيم يغنوا معاهم بأصوات عالية وتصقيف عالي جدا لدرجة أن الفرقة كانوا بدأوا ينزعجوا و يخافوا من الحماس ده وعلو صوتهم .

وكان فيه حاجة مش طبيعيه

بدأوا البنات يرقصوا و المعازيم نسيوا نفسهم وقفوا وفضلوا يتناوبوا الأدوار في الرقص والغني وفي اللحظة اللي كانوا بيرفعوا فيها فساتينهم وهم بيرقصوا

الفرقة شافت رجولهم

وكانت الصدمه

رجولهم رجول حيوانات!!

كل واحدة منهم بدأت تبحلق عينيها في رجل كل بنت بترقص ايه ده دي رجل حيوان؟!

بنات الفرقة فضلوا يبصوا لبعض وبدأت أصواتهم ترتعش... نورا كمان اللي شافت الرعب ده بصت لفرقتها وتواصلت معاهم بعينيها عشان يكملوا غنا و اوعوا توقفوا .. بس محدش فيهم كان قادر يغني ..

كانوا بيقولوا الكلمات كده وخلاص

لكن كلهم فى نفس الوقت بيسالوا نفسهم احنا فين ومين دول

وفجاه واحده من بنات الفرقه وقعت مُغمي عليها ... أخدتها نورا في الاوضة وفضلت تفوقها وتهديها ... البنت كانت مصابة بحالة عصبيه هستيرية وفضلت تقولها احنا لازم نطلع مشونى من هنا

. دول مش بشر زينا احنا هنا ! ؟

احنا بنغنى لجن

نورا اللي كانت فاهمة في المواضيع دي كويس قالتلها مش هتعرفي توقفي وتمشي مع نفسك ... مش هنقد نمشى غير لما نخلص والا هيأذونا.... مش فاضل كتير علي الفجر ... عايزة تطلعي سليمة من هنا.. قومي معايا واقعدي جنبي ...مترقصيش ولا تغني المهم تواجهي الموقف وطلعت نورا لفرقتها ... وكملوا غناهم وهما مش قادرين يبصوا في عين اي حد فيهم... كل اللي كانوا قادرين يعملوه هو أنهم يحسبوا الوقت الى ماكنش عايز يعدى

ونهاية الليلة ديه

...أما المعازيم فكانوا مشغولين بالرقص وبالغنا والاكل ...

فضلوا كده طول الليل

وأخيرا وقت أذان الفجر

وفجاه كل الأصوات سكتت مره واحده والنور قطع

كل حاجة سكتت وصمت تام لحد ما بنات الفرقة استوعبوا اللي حصل ..ومرة واحدة قطع سكون الليل صريخهم وصواتهم ... وطلعوا يجروا نحية الباب.. وسابوا كل حاجة وراهم ... فضلوا يجروا لحد مطلعوا من البوابات..

وفى الشارع بره جالهم رجل عجوز ...

نورا والبنات اللي معاها فضلوا خايفين منه جدااا علي أساس أنه واحد من اللي شافوه جوا ... ولما جالهم قال انتوا مين !! وايه اللي جابكم هنا!! ... وبتعملوا ايه في الوقت ده ؟! ..وفي وسط اسألته اللي مكنش لها نهاية اتعرف علي نورا الطقاقة اللي قالته أنهم فرقتى جينا نحيى فرح في البيت ده.. بس شفنا فيه حاجات غريبة خلانا نهرب جري منه ....

قالهم بيت ايه انهى بيت ؟ مافيش هنا بيوت ولاحفلات

واحدة منهم قالته لا البيت ده كان فيه الحفلة حتي بص علي........

وقبل متكمل كلامها وهى بتلف تشاور له

لكن كلهم فجاه واقفين كانهم اتجمدوا مكانهم من الصدمه

البيت الى كان اشبه بالقصر وزينه وانوار والوان وموسيقى وضيوف مالهومش اخر ، عباره عن بوابه قديمه مقفوله وجوه حيطان البيت متاكلة ومشرخه وجنينه كله زرع ناشف ودبلان... ولا فيه اى حد ولا اطفال ولا اى مخلوق كله عباره عن بيت مهجور بالكامل كله ضلمه ورعب وكأن الزمن بقى غير الزمن ....

الراجل العجوز قالهم البيت ده فاضي ومهجور من سنين طويله ومستحيل حد يعمل فيه فرح ...

البنات بعد سماعهم للعجوز كل واحدة فيهم استخبت في التانية ... عقلهم مش قادر يصدق او يفكر فى اي حاجة وبعد تجمع مجموعة من رجاله الحي ..قالوا

احنا طول عمرنا بنسمع أصوات غريبة بتخرج من البيت ده، وعارفين أنه مسكون ...

لكن ازاي وصلوا ليكم؟!

وازاي كلموكم ؟!

وازاي شوفتوهم ؟!

لو واحدة بس ...كنا قلنا تخيلات لكن انتوا ٧

وبعد ما البنات هديت تماما ركبوا عربيتهم ومشيوا لبيوتهم وكل واحدة فيهم بتبص عالبيت بصة أخيرة وبتسأل نفسها ايه اللي حصل لينا بالظبط ؟ وايه اللي شوفناه هنا وايه الى كان ممكن يحصلنا

هي دي حكاية الطقاقة نورا ...اللي كانت معزومة في فرح خاص بالجن .. نورا نفسها محكتش الحكاية دي بشكل رسمي... ولكنها القصة اللي حكوها المقربين لها و الست بنات واللي انتشرت في كل دول الخليج بقوة !!

ومن ساعتها الطقاقة نورا وفرقتها قرروا الاعتزال تماما وزى ماتمنينا لو خرجنا من هنا احياء وسالمين

في أسطورة شعبية بتقول ان كل الافراح الى بيكون فيها مزيكا وغنى بيكون فيها جن متلبس علي هيئة بشر وبيشركونا سواء بالغنا أو الرقص .

 https://www.youtube.com/watch?v=GMFO2EREB4A

نرجوا منك الاشتراك بالقناة تشجيعا لنا لنستمر فى تقديم المزيد من الفيدوهات وتسجيل إعجابك بالفيديو